བསྟན་འཛིན་ཕུན་ཚོགས།
དུས་ཚོད། ： 2016-12-06 རགས་གཟིགས་ཐེངས་གྲངས།：
བསྟན་འཛིན་ཕུན་ཚོགས།
ཁོང་ནི་༡༩༨༥ལོར་ལྷ་ས་རུ་སྐྱེས་ཤིང་ད་ལྟ་བོད་ལྗོངས་དགེ་འོས་མཐོ་རིམ་ཆེད་སྦྱོང་སློབ་གྲྭའི་སྐྱུ་རྩལ་སློབ་གླིང་དུ་དགེ་རྒན་གྱི་བྱ་བ་གཉེར་བཞིན་ཡོད།
བོད་ལྗོངས་བསྟན་པ་རབ་བརྟན་ཐང་གའི་སྒྱུ་རྩལ་སློབ་གྲྭའི་སློབ་གཙོ་དང་བོད་ལྗོངས་ཁ་དོག་སྒྱུ་རྩལ་ཁྱབ་སྤེལ་ཚད་ཡོད་ཀུང་སི་གསར་བསྐྲུན་པ། ཁ་དོག་ཁྲིམ་རྒྱུད་སྨན་ཐང་ལུགས་ཀྱི་མི་རབས་བཞི་བའི་རྒྱུན་འཛིན་པ་བཅས་ཡིན།
མི་སྒེར་གྱི་ལོ་རྒྱུས།
ཁོང་ཆུང་དུས་ནས་རི་མོ་འབྲི་བར་དགའ་ཞིང་རི་མོར་ཁྱིམ་རྒྱུད་ཀྱི་ཤུགས་རྐྱེན་ཟབ་མོའི་འོག་མི་འགྱངས་བར་རི་མོའི་ཐད་ལ་མཁས་པར་ཆགས། ཡང་མྱེས་ཚེ་རིང་རྒྱུའུ་ནི་དུས་རབས་སྔོན་མའི་དུས་འགོར་རྒྱལ་དབང་སྐུ་ཕྲེང་བཅུ་གསུམ་པའི་ཕོ་བྲང་གི་རི་མོ་མཁས་ཅན་པ་ཡིན་ཞིང་བཀའ་ཤག་སྲིད་གཞུང་བཟོ་རྩལ་གླིང་གི་དབུ་ཆེན་གྱི་མཚན་སྙན་གོ་སའང་ཐོབ་མྱོང་། ཨ་མྱེས་དྲུང་གཏོགས་སྐལ་བཟང་ནོར་བུས་རྒྱལ་དབང་སྐུ་ཕྲེང་བཅུ་གསུམ་པའི་སྐུ་གདུང་མཆོད་རྟེན་གྱི་ཇུས་འགོད་པ་ཡིན་ཞིང་ཁོས་སྐབས་དེའི་བོད་ལྗོངས་སྲིད་གཞུང་ལ་ཤོག་སྒོར་སྲང་བརྒྱ་དང་། ཤོག་སྒོར་སྲང་ཉེར་ལྔའི་བོད་ཀྱི་དངུལ་ལོ་གསར་དུ་བཟོས། སྐབས་དེར་ཡུལ་ཕྱོགས་ཀུན་ཏུ་སྙན་གྲགས་ལྷང་ལྷང་དུ་ལྡིར་བཞིན་ཡོད། ཡབ་ཆེན་བསྟན་པ་རབ་བརྟན་ནི་བོད་ལྗོངས་སློབ་གྲྭ་ཆེན་མོ་སྒྱུ་རྩལ་སློབ་གླིང་གི་སློབ་དཔོན་ཆེན་མོ་དང་ཞིབ་འཇུག་པའི་མཛུབ་སྟོན་དགེ་རྒན། རྒྱལ་ཁབ་རིམ་པའི་སྨན་ཐང་ལུགས་ཀྱི་དངོས་མིན་ཤུལ་བཞག་རིག་གནས་ཀྱི་རྒྱུན་འཛིན་པ་གྲགས་ཅན་བཅས་ཡིན།
བསྟན་འཛིན་ཕུན་ཚོགས་སློབ་མཐར་ཕྱིན་རྗེས་རང་གི་རེ་འདོད་ལྟར་དུ་མཛེས་རིས་དགེ་རྒན་དུ་གྱུར་ཞིང་། རང་གི་ཡབ་ཆེན་གྱིས་ལོ་རབས་བརྒྱད་ཅུའི་ནང་དུ་འཛུགས་པའི་སྨན་ཐང་ལུགས་ཀྱི་ཐང་ག་སློབ་གྲྭའི་འགན་ཁུར་གཙོ་བོ་དང་མཛུབ་སྟོན་དགེ་རྒན་བྱེད་བཞིན་ཡོད། སློབ་གྲྭ་འདི་ཉིད་༢༠༡༤ལོའ་ཟླ་༥པར་བོད་རང་སྐྱོང་ལྗོངས་སྨན་ཐང་ལུགས་དངོས་མིན་ཤུལ་བཞག་རིག་གནས་སློབ་སྦྱོང་བྱེད་སའི་རྨང་གཞི་ས་ཁུལ་དུ་གྱུར། ཐང་ག་སློབ་སྦྱོང་བྱེད་པའི་བརྒྱུད་རིམ་ཁྲོད་དུ་ཐང་གའི་སྒྱུ་རྩལ་ཐད་ནས་འབད་པ་ལྷོད་མེད་བྱས་པ་དང་སྒོས་སུ་སྲོལ་རྒྱུན་མཛེས་རྩལ་དེ་དེང་རབས་སློབ་ཁྲིད་ཁྲོད་གང་ལ་གང་འཚམ་གྱིས་འོས་སྦྱོར་བྱས། གཞན་ད་དུང་མཛེས་རིས་ཀྱི་མ་འོངས་པའི་འཕེལ་ཕྱོགས་དང་རྒྱུན་འཛིན་ཐད་ལ་དོ་ཁུར་ཆེན་པོ་བྱེད་བཞིན་ཡོད།
༢༠༡༤ལོར། རང་འགུལ་ངང་ཁ་དོག་སྒྱུ་རྩལ་ལྟེ་གནས་གསར་དུ་སྒྲུབ་ནས་རྒྱ་ཆེ་བའི་རི་བོ་བ་དང་བསམ་བློ་བརྗེ་རེས་བྱེད་སའི་གར་སྟེགས་ཆེ་ཤོས་ཞིག་བསྐྲུན་པ་དང་ད་ལྟའི་བར་དུ་ཐང་གའི་རིག་གཞུང་འཆད་ཁྲིད་དང་སྤུས་ལེགས་ཐང་ག་གང་མང་ཞིག་འགྲེམས་སྟོན་བྱེད་བཞིན་ཡོད།
༢༠༡༢ལོར། རང་གི་བརྩམས་ཆོས་༼དེང་རབས་བོད་ལྗོངས་ཞིང་འབྲོག་མང་ཚོགས་ཀྱི་ཆ་འཕྲིན་དང་དྲ་བ་༽ཞེས་པ་དེ་བོད་རང་སྐྱོང་ལྗོངས་ཀྱི་དྲིལ་བསྒྲགས་པུའུ་ཡི་བརྒྱ་ཐང་ལས་གཞིའི་ཁྲོད་དུ་བདམས་པ་རེད།
༢༠༡༣རང་གིས་བརྩམས་པའི་༼བཟོ་རྩལ་དཀར་ཆག་ཆེན་མོ་སྟེ་ཐང་གའི་སྒྱུ་རྩལ་༽ཞེས་པ་དངོས་སུ་དཔར་བསྐྲུན་བྱས།
༢༠༡༣ལོར་ཀྲུང་གོའི་རིག་གནས་སྲུང་སྐྱོབ་ཤུལ་བཞག་གླིང་གི་ལྷ་ལྡན་གཙུག་ལག་ཁང་གི་ལྡེབས་རིས་བསྐྱར་གསོ་ལས་ཀའི་ནང་ཞུགས།
༢༠༡༤ལོར། བརྩམས་ཆོས་༼མཁས་ཆེན་གྱི་རྒྱ་མཚོ་བརྒལ་བ་༽དང་༼རྡོ་རྗེ་འཇིགས་བྱེད་༽ཐའེ་ཝེན་ཁྲང་ལུའུ་མཛེས་རྩལ་ཁང་དུ་འགྲེམ་སྟོན་བྱས།
གཟེངས་བསྟོད་བྱ་དགའ།
༢༠༡༤ལོར་ཐང་ག་བརྩམས་ཆོས་༼མཁས་ཆེན་གྱི་རྒྱ་མཚོ་བརྒལ་བ་༽དེ་༼ཀྲུང་གོའི་སྐབས་གསུམ་པའི་ཆུ་ངོགས་གཉིས་དང་ས་གནས་བཞིའི་དངོས་མིན་ཤུལ་བཞག་རིག་གནས་དངོས་མང་སྟོན་ཚོགས་༽ནང་དུ་ཞུགས་ནས་རྒྱུན་འཛིན་ལུགས་གསར་གྱི་གསར་གཏོད་འགྲན་ཆེན་ཁྲོད་དུ་དངུལ་གྱི་རྟགས་མའི་བྱ་དགའ་གནང་།
༢༠༡༤ལོར་སྐབས་བཅུ་བའི་ཀྲུང་གོའི་རྒྱལ་སྤྱིའི་རིག་གནས་དགུན་ཚིགས་བཟོ་རྩལ་མཛེས་རྩལ་སྤུས་ལེགས་མཛེས་རྩལ་ཁྲོད་ཀྲུང་གོའི་བཟོ་རྩལ་མཛེས་རྩལ་གྱི་མེ་ཏོག་སྣ་བརྒྱའི་ཟངས་ཀྱི་རྟགས་མའི་བྱ་དགའ་བླངས།
༢༠༡༥ལོར། མཚར་ཉམས་འཇིག་རྟེན་ZXPOསྐབས་དང་པོའི་འཛམ་གླིང་རིག་གནས་བཤམས་སྟོན་ཁྲོད་བརྩམས་ཆོས་༼སློབ་དཔོན་པད་མ་འབྱུང་གནས་༽ལ་གསེར་གྱི་རྟགས་མའི་བྱ་དགའ་བླངས།
༢༠༡༥ལོར་ཐང་གའི་བརྩམས་ཆོས་༼མཁས་ཆེན་གྱི་རྒྱ་མཚོ་བརྒལ་བ་༽དེ་སྐབས་གཉིས་པའི་ཀྲུང་གོའི་ཐང་ག་སྒྱུ་རྩལ་དུས་ཆེན་སྤུས་ལེགས་འགྲེམས་སྟོན་གྲས་སུ་བདམས་ཐོན་བྱུང་།
